പോളണ്ടില് വിമാനത്താവളം അടച്ചിട്ടു; റോമില് യുദ്ധവിമാനങ്ങള് പറന്നുയര്ന്നു
ലണ്ടനിലെ ഹീത്രു വിമാനത്താവളത്തില് നിന്ന് പോളണ്ടിലേക്ക് പുറപ്പെട്ട എല്.ഒ.ടി (LOT) വിമാനത്തിന് ബോംബ് ഭീഷണി ലഭിച്ചതിനെ തുടര്ന്ന് വാര്സോ~മോഡ്ലിന് (WarsawModlin) വിമാനത്താവളത്തില് അടിയന്തരമായി നിലത്തിറക്കി. യാത്രക്കാരെ ഉടന് ഒഴിപ്പിക്കുകയും വിമാനത്താവളത്തിന്റെ പ്രവര്ത്തനം താല്ക്കാലികമായി നിര്ത്തിവെക്കുകയും ചെയ്തു. പരിശോധനയില് അസ്വാഭാവികമായി ഒന്നും കണ്ടെത്താത്തതിനെ തുടര്ന്ന് ഉച്ചയോടെയാണ് വിമാനത്താവളം വീണ്ടും തുറന്നത്. കോപ്പന്ഹേഗനില് നിന്നെത്തിയ എസ്.എ.എസ് (SAS) വിമാനത്തിനും ഭീഷണി ലഭിച്ചതിനെ തുടര്ന്ന് വാര്സോയിലെ ചോപിന് (Chopin) വിമാനത്താവളത്തില് സുരക്ഷാ പരിശോധനയ്ക്ക് വിധേയമാക്കി.
അതേസമയം, പോര്ച്ചുഗലിലെ ലിസ്ബണില് നിന്നും അയര്ലന്ഡിലെ ഡബ്ളിനില് നിന്നും റോമിലെ ഫ്യുമിസിനോ (Fiumicino) വിമാനത്താവളത്തിലേക്ക് പുറപ്പെട്ട രണ്ട് റയന്എയര് വിമാനങ്ങള്ക്കും ബോംബ് ഭീഷണിയുണ്ടായി. സംഭവത്തിന്റെ ഗൗരവം കണക്കിലെടുത്ത് ഇറ്റാലിയന് വ്യോമസേനയുടെ യുദ്ധവിമാനങ്ങള് അകമ്പടിയായി പറന്നുയര്ന്നു. പിന്നീട് ഈ ഭീഷണികളും വ്യാജമാണെന്ന് തെളിഞ്ഞു.
സ്പെയിനിലെയും ബള്ഗേറിയയിലെയും വിമാനങ്ങള്ക്കും ഭീഷണി
സ്പെയിന്: ബ്രിട്ടനിലെ മാഞ്ചസ്റററില് നിന്ന് സ്പെയിനിലെ മുര്സിയയിലേക്ക് (Murcia) പുറപ്പെട്ട റയന്എയര് വിമാനത്തിനും ഭീഷണി ലഭിച്ചു. സുരക്ഷിതമായി നിലത്തിറങ്ങിയ വിമാനത്തില് നിന്ന് യാത്രക്കാരെ മാറ്റിയ ശേഷം പോലീസ് നടത്തിയ പരിശോധനയില് സ്ഫോടകവസ്തുക്കളില്ലെന്ന് സ്ഥിരീകരിച്ചു.
ബള്ഗേറിയ: ഇസ്രായേലില് നിന്ന് ബള്ഗേറിയന് തലസ്ഥാനമായ സോഫിയയിലേക്ക് വന്ന വിമാനത്തിന് ഇമെയില് വഴിയാണ് ബോംബ് ഭീഷണി ലഭിച്ചത്. വിമാനം സോഫിയയില് ഇറങ്ങിയ ഉടന് തീവ്രവാദ വിരുദ്ധ സേന പരിശോധന നടത്തി സുരക്ഷ ഉറപ്പാക്കി.
കഴിഞ്ഞ തിങ്കളാഴ്ച ലണ്ടനില് നിന്ന് സോഫിയയിലേക്ക് പോവുകയായിരുന്ന വിസ്എയര് (WizzAir) വിമാനത്തിനും ആകാശത്തുവെച്ച് ബോംബ് ഭീഷണി ലഭിച്ചിരുന്നു. തുടര്ന്ന് ഈ വിമാനം ഹംഗേറിയന് തലസ്ഥാനമായ ബുഡാപെസ്ററിലേക്ക് തിരിച്ചുവിടുകയായിരുന്നു. തുടര്ച്ചയായി ഉണ്ടാകുന്ന ഈ വ്യാജ ഭീഷണികള്ക്ക് പിന്നില് ഒരേ സംഘമാണോ പ്രവര്ത്തിക്കുന്നതെന്ന് കണ്ടെത്താന് യൂറോപ്യന് സുരക്ഷാ ഏജന്സികള് അന്വേഷണം ആരംഭിച്ചിട്ടുണ്ട്.

Comments: