തീരുവ പ്രഖ്യാപനം അമെരിക്കയ്ക്ക് ഒരു തരത്തിലും ഗുണം ചെയ്യില്ലെന്നു മാത്രമല്ല, ഏറ്റവും മോശം ഫലം നല്‍കുമെന്നും ജോണ്‍ ബോള്‍ട്ടന്‍ വ്യക്തമാക്കി. ഇന്ത്യയെ റഷ്യയില്‍ നിന്നും ചൈനയില്‍ നിന്നും അകറ്റാനുള്ള അമെരിക്കയുടെ പതിറ്റാണ്ടുകളായുള്ള ശ്രമത്തെ ട്രംപ് അപകടത്തിലാക്കി. ഇന്ത്യയുമായുള്ള ബന്ധം മോശമാകാന്‍ ഇടയാക്കിയത് യുഎസിന്‍റെ പ്രധാനപ്പെട്ട ഒരു ലക്ഷ്യത്തെ ദുര്‍ബലപ്പെടുത്തുന്ന നടപടിയായെന്നും ബാള്‍ട്ടന്‍ പറഞ്ഞു.
ട്രംപിന് ചൈനയോട് മൃദു സമീപനമാണെന്നും ഒരേസമയം ഇന്ത്യയ്ക്ക് തീരുവ ചുമത്തുകയും ചൈനയ്ക്ക് തീരുവ ചുമത്താതിരിക്കുകയും ചെയ്തത് ഇന്ത്യ മോശമായി പ്രതികരിക്കാന്‍ കാരണമായെന്നും അദ്ദേഹം പറഞ്ഞു. ചൈനയുമായി കരാര്‍ ഒപ്പിടാനുള്ള തിരക്കു മൂലം ട്രംപ് യുഎസിന്‍റെ താല്‍പര്യങ്ങളെ ബലി കഴിക്കുകയാണ്. ഇതു വഴി റഷ്യയ്ക്ക് അവരുടെ അജണ്ട നടപ്പാക്കാനും യുഎസ് ചുമത്തിയ ഉയര്‍ന്ന തീരുവയെ ഉപയോഗപ്പെടുത്താനും സാധിക്കുമെന്നും ബോള്‍ട്ടന്‍ മുന്നറിയിപ്പു നല്‍കി.
ചൈനീസ് പ്രസിഡന്‍റ് ഷി ജിന്‍പിങുമായി കരാറില്‍ ഏര്‍പ്പെടാനുള്ള തിടുക്കം മൂലം ട്രംപ് അമെരിക്കയുടെ താല്‍പര്യങ്ങളെ ബലി കഴിക്കുകയാണ് എന്ന് ബോള്‍ട്ടന്‍ മുമ്പ് ചൂണ്ടിക്കാട്ടിയിട്ടുള്ളതാണ്. 25 ശതമാനം തീരുവയായിരുന്നു ഇന്ത്യയ്ക്കു മേല്‍ അമെരിക്ക ആദ്യം പ്രഖ്യാപിച്ചിരുന്നത്. റഷ്യയില്‍ നിന്ന് എണ്ണ വാങ്ങുന്നതിന് എതിരായ താക്കീത് അംഗീകരിക്കാന്‍ ഇന്ത്യ തയാറാവാത്തതിനെ തുടര്‍ന്നാണ് 25 ശതമാനം കൂടി അധികമായി ചുമത്തിയത്. ഇതോടെ ഇന്ത്യന്‍ ഉല്‍പന്നങ്ങള്‍ക്ക് യുഎസില്‍ 50 ശതമാനം തീരുവയായി. അമെരിക്കയുടെ ഈ തീരുവ പ്രഖ്യാപനത്തോട് ശക്തമായ ഭാഷയിലാണ് ഇന്ത്യ പ്രതികരിച്ചത്.
Comments: