ബ്രിട്ടനില്‍ ലൈംഗിക കുറ്റകൃത്യങ്ങളില്‍ ശിക്ഷിക്കപ്പെടുന്ന വിദേശികളില്‍ മുന്നില്‍ ഇന്ത്യക്കാര്‍

ലണ്ടന്‍: ബ്രിട്ടനില്‍ ലൈംഗിക കുറ്റകൃത്യങ്ങളില്‍ ശിക്ഷിക്കപ്പെടുന്ന വിദേശികളില്‍ ഏറ്റവും കൂടുതല്‍ ആളുകള്‍ ഇന്ത്യക്കാരെന്ന ഞെട്ടിപ്പിക്കുന്ന റിപ്പോര്‍ട്ട് പുറത്ത്. 2021~2024 വര്‍ഷത്തെ കണക്കുകളിലാണ് ഇത് പുറത്തുവന്നത്. ബ്രിട്ടീഷ് നീതിന്യായ വകുപ്പ് ആണ് കണക്കുകള്‍ പുറത്തു വിട്ടത്. 2024ല്‍ 100 ഇന്ത്യക്കാര്‍ ലൈംഗിക കുറ്റകൃത്യങ്ങളില്‍ ബ്രിട്ടനില്‍ ശിക്ഷിക്കപ്പെട്ടു.2021ല്‍ ഇത് 28 മാത്രമായിരുന്നു. നൈജീരിയയാണ് രണ്ടാമതുള്ളത്. ഇറാഖ് പൗരന്മാരാണ് ഇത്തരം കേസുകളില്‍ ശിക്ഷിക്കപ്പെട്ടവരില്‍ മൂന്നാമതുള്ളത്.

2021~24 കാലയളവില്‍ ഗുരുതരമായ കുറ്റകൃത്യങ്ങള്‍ക്ക് ശിക്ഷിക്കപ്പെട്ട വിദേശ പൗരന്മാരില്‍ മൂന്നാം സ്ഥാനത്തും ഇന്ത്യക്കാരുണ്ട്. 115 ശതമാനം വര്‍ധനവാണ് ഈ കണക്കില്‍ രേഖപ്പെടുത്തിയിരിക്കുന്നത്. ഈജിപ്ത്, അള്‍ജീരിയ സ്വദേശികളാണ് ഈ പട്ടികയില്‍ ഇന്ത്യക്കാര്‍ക്ക് മുന്നിലുള്ളത്. 2024ലെ കണക്കുകള്‍ പരിശോധിക്കുമ്പോള്‍ ഗുരുതരമായ കുറ്റകൃത്യങ്ങളുടെ പേരില്‍ 588 ഇന്ത്യന്‍ പൗരന്മാരാണ് ശിക്ഷിക്കപ്പെട്ടത്.2021ല്‍ 273 പേരായിരുന്നു ശിക്ഷിക്കപ്പെട്ടത്.

യുകെയിലേയ്ക്ക് അനധികൃതമായി കുടിയേറുന്നവരുടെ പട്ടികയിലും ഇന്ത്യക്കാരുണ്ടെന്നും ബ്രിട്ടീഷ് നീതിന്യായ വകുപ്പിന്‍റെ കണക്കുകള്‍ പറയുന്നു. ചെറിയ ബോട്ടുകളില്‍ കഴിഞ്ഞ വര്‍ഷം 293 ഇന്ത്യന്‍ പൗരന്മാര്‍ നിയമ വിരുദ്ധമായി യുകെയില്‍ എത്തിയെന്നാണ് ഡേറ്റകള്‍ പറയുന്നത്. ജനുവരി മുതല്‍ ജൂണ്‍ വരെയുള്ള കാലയളവില്‍ 206 പേര്‍ ഇത്തരത്തില്‍ യുകെയില്‍ എത്തിയതായും റിപ്പോര്‍ട്ടുകളുണ്ട്.