കശ്മീരി ജനതയ്ക്ക് സ്വയം നിര്ണയാവകാശം നല്കണമെന്നും അവിടെ അന്താരാഷ്ട്ര നിരീക്ഷകരെ നിയോഗിക്കണമെന്നും ആവശ്യപ്പെട്ട് 2019ല് അന്നത്തെ നേതാവ് ജെറമി കോര്ബിന്റെ നേതൃത്വത്തില് അടിയന്തര പ്രമേയം കൊണ്ടുവന്നിരുന്നു. ആണവ യുദ്ധം ഒഴിവാക്കാന് ഇന്ത്യ~ പാക് ഹൈക്കമ്മിഷണര്മാര് ചര്ച്ച നടത്തണമെന്നും ഇതില് നിര്ദേശിച്ചു. സ്വന്തം വോട്ട് ബാങ്ക് താത്പര്യങ്ങളെ തൃപ്തിപ്പെടുത്താനുള്ള നീക്കമാണിതെന്നു തുറന്നടിച്ച ഇന്ത്യ, പ്രമേയം തള്ളി. ഈ പ്രമേയമുണ്ടാക്കിയ പ്രശ്നങ്ങള് തിരിച്ചറിഞ്ഞായിരുന്നു സമീപകാലത്ത് സ്ററാര്മറുടെ മനംമാറ്റം.
കശ്മീര് ഇന്ത്യയുടെ ആഭ്യന്തര കാര്യമെന്നും ഇന്ത്യ~ പാക് പ്രശ്നങ്ങള് ഉഭയകക്ഷി ചര്ച്ചയിലൂടെ മാത്രം പരിഹരിക്കേണ്ടതാണെന്നും തെരഞ്ഞെടുപ്പു പ്രചാരണത്തിനിടെ ഇന്ത്യന് വംശജരായ വോട്ടര്മാരോട് സ്ററാമര് ആവര്ത്തിച്ചിരുന്നു. ഇന്ത്യയുമായി തന്ത്രപരമായ ബന്ധം തുടരുമെന്നു പറഞ്ഞ അദ്ദേഹം ദീപാവലിയും ഹോളിയും ആഘോഷിക്കാന് ഇന്ത്യന് സമൂഹത്തിനൊപ്പമെത്തിയാണ് ഐക്യദാര്ഢ്യം പ്രകടിപ്പിച്ചത്. 19 ലക്ഷം ഇന്ത്യന് വംശജരാണ് യുകെയിലുള്ളത്. ആകെ ജനസംഖ്യയുടെ 2.5 ശതമാനം. വോട്ടില് ഇവരുടെ സ്വാധീനം അവഗണിക്കാനാവില്ല ഒരു പാര്ട്ടിക്കും.
മുന്കാലങ്ങളില് പൊതുവേ ലേബര് പാര്ട്ടിയോടായിരുന്നു ഇന്ത്യന് സമൂഹത്തിന് ആഭിമുഖ്യം. എന്നാല്, ഇന്ത്യയുടെ ആഭ്യന്തര കാര്യങ്ങളില് ലേബര് പാര്ട്ടി സ്വീകരിക്കുന്ന നിലപാടും ഋഷി സുനക് ഉള്പ്പെടെ ഇന്ത്യന് വംശജര്ക്ക് കണ്സര്വേറ്റിവ് പക്ഷത്ത് ലഭിക്കുന്ന പരിഗണനകളും വലിയൊരു വിഭാഗം വോട്ടര്മാരെ മറുപക്ഷത്തേക്കു ചായാന് പ്രേരിപ്പിച്ചു. പാക്, ബംഗ്ളാ സമൂഹങ്ങളിലാണ് ലേബര് പാര്ട്ടി ശ്രദ്ധ കേന്ദ്രീകരിക്കുന്നതെന്ന പരാതിയും ഇന്ത്യന് സമൂഹത്തില് നിന്നുയര്ന്നു. ഇവയെല്ലാം പരിഹരിക്കാന് പരമാവധി ശ്രമം നടത്തിയിരുന്നു സ്ററാമര്.
ഇന്ത്യ ആഗോള തലത്തില് കരുത്തുറ്റ, പ്രധാനപ്പെട്ട രാജ്യമാണെന്ന് സ്ററാമര് സമീപകാലത്ത് പലതവണ അഭിപ്രായപ്പെട്ടത് മഞ്ഞുരുക്കാനുള്ള ശ്രമമായിരുന്നു. 2022ല് സുനക് സര്ക്കാരിന്റെ കാലത്ത് മുന്നോട്ടുവച്ച ഇന്ത്യ~യുകെ സ്വതന്ത്ര വ്യാപാരക്കരാര് (എഫ്ടിഎ) യാഥാര്ഥ്യമാക്കുന്നതില് പ്രതിജ്ഞാബദ്ധരാണെന്നും ചര്ച്ച തുടരുമെന്നും ലേബര് പാര്ട്ടി വ്യക്തമാക്കിയിരുന്നു. സാങ്കേതികവിദ്യ, പ്രതിരോധ മേഖലകളില് ഇന്ത്യയോട് തന്ത്രപ്രധാന പങ്കാളിത്തം തുടരുമെന്നും ലേബര് പാര്ട്ടി നേതൃത്വം പറയുന്നു.

Comments: